【Now財經台】美國通脹係咪真係一如聯儲局所講只係暫時性，明年第2、3季就會回落，暫時仲係未知數，但相信美國人會感受到通脹壓力愈來愈大，咁人工升幅追唔追得上？

 

「股市漁夫」創辦人莊志雄指，最近美國人唔肯返工嘅情況嚴重咗，問題係要睇企業會唔會大幅加薪去吸引人返工，如果會的話就會影響企業盈利，加上依家通脹升得快過人工，而美國總統拜登嘅支持度又一路跌，所以政府係有壓低通脹嘅壓力，依家唯一唔知係聯儲局會唔會任由通脹繼續升，尤其聯儲局主席可能會換人。

 

Lewis又話，其實聯儲局嘅口風都變咗，估計通脹明年下半年有機回落，如果通脹明年9月先回落，咁係咪暫時性？反映市場唔係錯，美國出現滯脹係有道理，只係聯儲局嘅行動跟唔上個形勢。

 

 

 

「股市漁夫」創辦人莊志雄指，幾個星期前已講過要留意季節性因素，如果睇返標指過去嘅季節性軌跡，第3季通常都會回落，今年就係9月回落，但去到10月中，調整嘅因素開始減退，依家都係跟返過往第4季嘅表現，但要留意一樣嘢，就係升得咁急之後，可能會出現調整或整固，如果跟返以往嘅季節性因素，未來兩三個星期，美股可能會有一個整固或調整，之後可能有一浸升。

 

 

「股市漁夫」創辦人莊志雄指，港股今年弱勢，唔計今日恒指累跌5.3%，美股表現就好好多，標指累升約20%，納指就累升17%，但都大幅跑輸畀今年造得最好，累升42%嘅商品指數。至於第4季表現 ，佢話未肯定恒指已脫險，因為第一步要先升穿今年9月高位，其次係8月有一個下跌裂口，亦要先補返呢個裂口，然後要再升穿150天線，咁樣先確認恒指脫險。

 

 

「股市漁夫」創辦人莊志雄指，Jackson Hole年會後其實係一個轉折位，美股喺會議結束後出現一個短暫亢奮，但其實係一個走勢陷阱，好多人喺「嗰一下」諗住聯儲局係鴿派，所以追入咗，但之後美股好快就回落，美債亦要跌，但呢個唔係聯儲局樂見，所以唔「收水」都唔得，另一方面，通脹升、物價升會影響「放水」空間，市場依家正正係驚呢樣嘢。