【名家給力場】礦業股最快5月爆「抽水潮」？ 【Now財經台】受惠於美元回軟，內地金礦股連日發力，今日其他金屬資源股亦造好，不過，勝利瑞柏基金管理合伙人暨投資總監陳建良提醒，投資礦業股應回歸基本面，切忌只見外圍因素就盲目高追，亦要小心美國突然出現通縮，佢更預期，呢個板塊今輪抽升後，最快5月就會爆「抽水潮」。 KL表示，金屬礦嘅質量同公司估值關連性最大，內地高質量礦唔多，加上開採金屬礦須投放好多資本，導致唔少中資礦企有高負債問題。 佢續指，業績期剛剛過咗，可以做返公司行動(corporate action)，話參考以往國企礦業股嘅歷史，某啲高負債、高市帳率(PB)公司或會趁高位配股，咁啱今日有隻五礦資源(01208)價量齊升，KL就話投資者要小心配股風險。 【名家給力場】礦業股最快5月爆「抽水潮」？
【Now財經台】今日係港股第1季最後一個交易日，恒指今季先高後低，季初一度高見22700點，到季尾曾失守19000關，截至今日，已收復返從高位回落嘅半數失地。港股上落市格局喺季尾愈來愈明顯，但成交始終冇乜起色，今季日均成交約1200億元。 展望第2季，勝利瑞柏基金管理合伙人暨投資總監陳建良指，依家市場仍有好多不確定性，例如經濟衰退程度、聯儲局幾時停止加息、內地經濟復甦速度等，所以成交唔會暢旺，佢估計，港股會繼續係上落市，波幅將較首季約3800點更細，悶局可能最少持續至6月中。 此外，唔少人博加息周期息差擴闊買入本地銀行股，但近日呢個板塊表現好差，其中，噚晚出咗業績嘅中銀香港(02388)，今朝最多跌6%，而恒生銀行(00011)近期亦差唔多落到去年10月低位。 KL認為，借貸利息上升令息差擴闊，但亦因為高息令借貸需求減少，加上銀行吸存款嘅成本不斷上升，繼而影響盈利，而高息環境亦會影響銀行持有資產嘅穩定性。 佢續指，本地銀行經營環境正在轉差，側重銷售、非利息收入佔比較高嘅銀行，例如中銀香港，未來將受到更大打擊，股價好可能向下，建議等銀行股估值再平啲先買貨。
