「股市漁夫」創辦人莊志雄指，債息升唔多唔少受國債拍賣反應麻麻影響，嚟緊要留意3月11日，因為會拍賣10年期國債，同埋個額都唔細。佢又話，股市噚日反彈，同通脹預期有少少炒過龍有關，債息抽穿1.5厘後，股市就開始調整，主要集中喺增長股、科技股，調整幅度都比較深，但如果用5年期及30年期打和利率去做一個比較，會睇到息差去到正數，反映市場對通脹預期非常高。

Lewis又話，短線突然抽到咁高有啲過咗龍，長遠通脹係會升，繼而影響利率，但短期利率未必需要抽到咁高，所以通脹預期係過咗火。佢又指，近期多咗人做短倉，有一班專業投資者專睇個趨勢再落注，呢班人叫CTA，依家環球成熟市場債券淡倉水平係10年以嚟最低水平，反映可能造淡造到過咗龍，如果國債拍賣理想，可能會挾一挾淡倉。

長證國際資產管理部董事總經理陳建良估計，港股今季可能呈一個M形走勢，如果真係出現呢個情況，港股調整應該未夠，事實上都只係跌咗一兩日，外界可能覺得北水會好似2007年、2015年咁，唔問價咁衝入嚟買，但睇返北水買嘅股份、流入速度，其實係非常理性嘅投資者，加上中美唔再係「拍晒枱」咁，個市會有一股向下嘅吸力吸返落去，今季調整完之後，可能升幅會冇晒，佢又話，頂應該見咗，底可能係28000點水平。

「股市漁夫」創辦人莊志雄指，其實美股喺舊年9月有一個幾明顯嘅變化，開始炒經濟重啟，加上美元回軟，債息又慢慢升返上去，有利舊經濟同新興市場，所以美股喺9月初見咗高位後，一般人鍾意揸嘅股票都跑輸指數，除咗Alphabet，Facebook更加要輸錢，反而新興市場表現更好，單係指數已跑贏個股，因為新興市場嘅ETF，以六個月計，升咗20%至30%。佢又話，過去幾個月，美股買指數贏錢容易過買股，投資者鍾意揸嘅股票表現都幾參差，Tesla舊年係造得最好，但今年就無力升，跟唔到個指數。

Lewis話，新興市場就中國造得最好，計埋人民幣升值嘅滬深300 ETF跑贏印度、俄羅斯、巴西，帶挈埋港股喺牛年返嚟都開紅盤。如果純粹以估值角度出發，新興市場係較值博，但要留意...