渣打推出「防騙大查樓」 首創防騙點心助長者識別詐騙手法

渣打為提升公眾防騙意識，將灣仔龍點心改裝成期間限定嘅「防騙大查樓」，推出5款「防騙點心」，融入防騙資訊寓學習於美食。市民在今日和明日去嗰度有任何消費，就可以換領指定防騙點心一盅，長者持樂悠和長者卡，由下星期一到6月2日都可以消費後憑卡換領。5款防騙點心命名都好有心思，包括「亂撳link就棗糕」、「難分真與餃」、「小鮮肉電話粥」、「私人密碼拉糕」及「貪念牛慾求」，務求長者喺享用點心時，都可以用點心思防範詐騙。渣打仲請咗胡楓同周嘉洛拍攝多條電視短片宣傳防騙，而渣打義工隊會喺6月探訪多個長者中心，同舉行教育活動，預計可以同逾千個公眾宣傳防騙知識。銀行業界一路都好重視打擊詐騙，渣打香港區行政總裁禤惠儀話佢哋今年第一季成功攔截嘅騙款按年上升超過四成。金管局副總裁阮國恆就話唔少涉及長者案件係電話騙案，騙徒可以畀到一啲長者或家人嘅資料，博取受害人信任嚟呃錢同個人資料，佢提醒長者要用慣常聯絡方法同家人核實，又可以先同家人設定一個暗號嚟核實身分，若有懷疑可以打防騙易熱線18222同警方聯絡。