【名家給力場】礦業股最快5月爆「抽水潮」？

【Now財經台】受惠於美元回軟，內地金礦股連日發力，今日其他金屬資源股亦造好，不過，勝利瑞柏基金管理合伙人暨投資總監陳建良提醒，投資礦業股應回歸基本面，切忌只見外圍因素就盲目高追，亦要小心美國突然出現通縮，佢更預期，呢個板塊今輪抽升後，最快5月就會爆「抽水潮」。

KL表示，金屬礦嘅質量同公司估值關連性最大，內地高質量礦唔多，加上開採金屬礦須投放好多資本，導致唔少中資礦企有高負債問題。

展望第2季，勝利瑞柏基金管理合伙人暨投資總監陳建良指，依家市場仍有好多不確定性，例如經濟衰退程度、聯儲局幾時停止加息、內地經濟復甦速度等，所以成交唔會暢旺，佢估計，港股會繼續係上落市，波幅將較首季約3800點更細，悶局可能最少持續至6月中。

KL續指，聯儲局資產負債表過去幾日大升，喺依家貨幣政策寬鬆，但唔減息嘅環境下，銀行為吸引存款而加存款息，貸款時亦更審慎，推高利息成本，銀行淨息差將大幅收窄，造成惡性循環。佢又話，銀行唔少抵押資產係國家債券，可能因為聯儲局一直唔減息，要面對貨幣貶值風險，亦對銀行造成財務壓力。

KL又認為，今年不宜沾手歐美金融股，並預期整個金融業將會信貸收縮，引發美國樓市爆煲，持有唔少國債投資嘅保險公司將續受加息影響，更嚴重嘅情況係，某啲中型國家嘅國債會出事。

【名家給力場】救歐美銀行業實將急性病變慢性重病 

「股市漁夫」創辦人莊志雄指，投資者真係唔好跟車太貼，市場普遍睇利率期貨去做加息預測，如果過去1個月真係跟住啲市場預測去做投資部署，真係好容易「左一巴、右一巴」，比市場牽住走。

Lewis又話，美國依家係步向衰退，經濟會硬著陸，但通脹又未回落，呢個情況唔係靠加息減息可以扭轉。佢估計，聯儲局今個月會加息0.25厘，但之後就會暫停，原因係...

【名家給力場】聯儲局加埋今次息會收手？

勝利瑞柏基金管理合伙人暨投資總監陳建良指，其實呢個炸彈一直存在，隨著聯儲局要持續加息遏通脹，會影響好多資產價格，如果銀行買長債或者投資冇乜流動性嘅產品，一旦利息上升，而喺借短買長下，如果後者跌就要面對liquidity crunch，邊間會爆係好難講，但會產生漣漪效應，佢認為呢個效應已經發酵咗，好多人都有誤解，加息就要買銀行股，KL認為，首先要諗下點解要加息，唔係因為經濟好而加息，反而係被逼加息，資產價格會下調，銀行可能要面對違約潮。

KL續指，舊年出現「金融黑洞」，科網股因為加息喺10月冧價，依家似乎進入「金融黑洞2.0」，資產泡沫離開科技股進入生活層面。

【名家給力場】「金融黑洞2.0」殺埋身？

「股市漁夫」創辦人莊志雄指，混亂係聯儲局一手造成，依家再推遲減息，未來可能因為加息加過龍，導致美國經濟嚴重衰退，睇返終極利率，由於局方經常「嗡三嗡四」，令市場參與者之前以為利率已見頂，但依家又走出嚟講嘢，原因係過去1個月公布嘅數據，反映通脹仍高居不下，佢又話，佢之前已經估計美國通脹已見頂，但要急速回落唔係咁易。

Lewis又指，若聯儲局之前冇講放慢加息步伐，如果投資者只係估估下就唔會亂炒，1月講完嘢之後，令投資者有個錯覺聯儲局好快加完息，甚至今年開始減息，由於局方冇預測能力，通脹走向亦唔會知，一見到數據唔對路，又要掉轉講，增加咗美國利率預期嘅波動性，絕對唔係好事。

【名家給力場】聯儲局亂嗡令市場混亂 

Lewis解釋，目前聯儲局關注嘅「超級核心」通脹(supercore inflation)，即係核心通脹減住房價格，升幅大過預期，令市場再次調整對加息幅度及周期嘅預測。

根據衍生工具市場數據顯示，利率期貨交易員預期，聯儲局最終會加息至6厘以上，進一步遏通脹，Lewis認為，通脹見頂後唔會立即回落，高息率將繼續對債市及股市造成壓力。

Lewis續指，標指嘅股份收益率同聯邦基金利率好近，削弱咗持股吸引力，估計今年機構投資者會抽走股市資金去做現金投資，至於納指，佢就話可以用基金倉位指標作相反指標，因為…

【名家給力場】美股3月繼續調整 

「股市漁夫」創辦人莊志雄指，美國通脹係難達標，雖然預期會見頂回落，但估計速度係會慢，噚晚出爐嘅CPI就證實咗。佢又話，CPI細分項中，最大係租金，而睇返各分項亦唔係整體向下，如果睇返過3個月嘅變化，逾半細分項嘅升幅係多過12月嘅升幅，係有一種再度加速嘅味道，唔止回落速度慢，係有掉頭回升嘅風險。

Lewis又話，租金喺2021年後持續向上，所以最近會聽到聯儲局想搬龍門，想做一個「超級核心通脹率」出嚟，即唔包括食品、能源、租金，而衣食住行中有3項都唔包，唔知呢個「核心」係點，其中租金佔CPI近40%，撇除咗租金，通脹當然會回落，但市場buy唔buy係另一回事。

【名家給力場】美通脹有掉頭回升風險

「股市漁夫」創辦人莊志雄指，呢個係市場解讀，但最重要係睇返資產價格表現，因為可以反映市場點樣解讀，反而市場人士點講係另一回事。佢認為，過去一星期資產價格表現幾奇怪，可能市場聚焦喺美股標普500指數身上，但其實鮑威爾發言後，或重磅科技股出咗業績後，出現一個奇怪現象，就係美元升，美債跌價，美債息升，而對利率十分敏感嘅黃金，價格亦下跌，如果睇返資產價格，除美股外，偏向係「水緊咗」。

Lewis又話，嗰個星期鮑威爾講咗兩次嘢之後，睇資產價格除美股外都係偏緊，所以佢講嘢鷹或鴿並唔重要，最重要係睇返資產價格表現。