文章分享

【Now財經台】內房股呢兩日彈高，花旗嘅報告預期，內房股仲有10%至15%反彈空間，今輪升勢可能持續到11月，而中央喺六中全會召開前出手維穩，除要求銀行加快審批樓按，人行副行長亦指內房融資逐步回復正常。

勝利瑞柏基金管理合伙人暨投資總監陳建良指，唔少市民攞晒成副身家去買樓，阿爺今次只係派定心丸畀買咗樓嘅市民，但從來冇話過要幫内房墊底，實情係中國恒大(03333)事件，令好多市民對房地產失去信心，未必想再買樓，減少咗地方政府嘅收入，所以中央唔會對內房見死不救。

【名家給力場】阿爺唔會對內房見死不救(上)

勝利瑞柏基金管理合伙人暨投資總監陳建良指，美股今年已9次跌穿50天線，但之後都會創新高，最近4次都好接近期權結算日，大市都係先跌後升，但今次未必會咁行。

KL又話，美股前幾次波動，都係連跌後連升，但今次跌足6日先升返1日，依家仲繼續跌緊，踏入10月呢個傳統股災月，加上就快議息，可能令美股走勢進一步轉差，因此，美股唔單止危過港股，美股一跌，港股都可能跟跌。