【技術分析】VCP型態選股法: 冠軍操盤手的兩個秘訣

「請注意頁底重要聲明」

冠軍操盤手的兩個秘訣

大家好,又係我漁米家😄
 
股神巴菲特20年前受訪時,曾提及「當退潮時,才知道誰在裸泳」. 我覺得好配合接着落嚟講嘅兩個話題,呢啲都係散戶最大弱點,退潮時(市寛轉弱)就知邊個冇trading plan,同不懂得倉位管理。選股同VCP買入法有一定必然規矩,所以通常你死跟方法,效果都唔會太差。但trading plan同倉位管理(特別係倉位管理),技術含量最高,我現在還要花了很長時間,透過操盤經驗慢慢浸出來。特別在股市回調訓練出來。
 

倉位管理

個市升通常唔覺有問題,但個市一轉差,啲散戶就會問點算,一問之下就知佢哋冇trading plan ,同埋冇做倉位管理。散戶一般心態都係想知咩冧把會升,喺咩位入,發展到近年大熱App,直頭跟大佬玩copy trade ,可見呢種速食文化係幾咁受歡迎!另一個常見嘅陋習係,沒有預設規條去沽出或減持一隻持股(sell rules),Sell rules其實都係不外乎兩種,一種係趁強勢賣出(sell on strength) ,同埋趁弱勢賣出(sell on weakness)。以上兩種方法各有優點缺點。 當股價突然過份延伸(overextended)嘅時候,趁強勢沽出是企圖避開回調。 呢種方法嘅好處就係,唔需要捱一輪回調,可以減少戶口drawdown,但唔好處就係食唔到可能出現的升浪。趁弱勢沽出嘅好處就係,有機會食盡一個大浪,等到股價跌穿某一啲重要平均線或支持位先沽出,但唔好處係每一段子浪都要經歷或多或少嘅回調,每一次回調可能都會測試你對一隻股票基本分析(FA)嘅conviction 夠唔夠強。我自己覺得最好嘅做法就係一隻股票分一定嘅比例趁強勢賣出,呢部份叫trading position,而核心持倉(core position)就等到轉弱才沽出(sell on weakness)。當然,你亦都可以為某隻股票定單一策略,我都會因應市況而決定一隻股票嘅買賣策略,最簡單嘅做法就係半注sell on strength,半注sell on weakness。Trading Plan 係可以中途改變,但入場之前已經有一個預設,唔會等到關鍵時刻先諗,搞到手忙腳亂。請記住,事前定好策略先可以管理好自己嘅心理,令自己維持在一個有準備嘅狀態,因為落trade之後好容易活在貪婪與恐懼之中,就算係老手一樣會被情緒影響。最常用嘅方法係事前做mental rehearsal,時時刻刻都要照顧自己心理先,一次輸錢贏錢係其次,因為你唔會成世人淨係做一個月嘅trade 就搞掂,正如我之前所講,目標係想做到穩定地、持續地見到戶口水平一級一級咁上。我亦都可以保證,如果你入場前已經好好定立你嘅trading plan,中間有咩事你都會鎮定處理,長遠來說一定係利多於弊。
 
跟住落嚟就講倉位管理,有樣嘢我覺得幾有趣,唔少散戶都想等一個股災嘅機會先入市(包括以前嘅我),但佢哋可能冇諗過一直揸cash等股災,亦係一個單邊睇淡嘅危險做法。你一生人遇到嘅股災有幾多次?係咪其餘時間就完全唔交易?一路都冇練習過⋯⋯到機會嚟嘅時候,你夠唔夠經驗操作?
 

漸進式加倉減倉(Progressive Exposure)

我認為最佳應對方法係漸進式加倉減倉(Progressive Exposure),開始時可以先做30% exposure,確認30%嘅倉位都行得比較理想,先考慮繼續加上去,並要時時刻刻考慮重倉嘅風險。如果一下子推到100% exposure ,你能唔能夠承受整個股票倉一下子見10% drawdown?
 
我認為漸進式加倉減倉係一個最可行嘅做法,亦都係可以用嚟應付所有市況嘅做法,當頭30%嘅exposure 成功產生利潤, 手上就有利潤去頂住新加倉位嘅額外風險,成個人心態已經變得好唔同,就算萬一所有倉位最終都輸,drawdown亦會細好多,呢個亦都係協助我強化心理質素嘅最好方法。
 
當大市轉弱嘅時候,好多時候見到啲朋友仔會好緊張周圍問人點睇個市,我次次都會問返佢哋整體户口表現係點?我認為呢一樣嘢先係最重要,唔好本末倒置,見樹不見林。因為每個人嘅大倉表現可以好唔同,升市嘅時候有啲人都可以蝕錢!
 
投資者其實只有一個目標,就係戶口要持續地、一步步慢慢升,drawdown 雖然一定有,但做得啱就你應該見到條equity curve慢慢拋離恒生指數。極端啲講,如果某一日恒生指數跌得好甘,但你戶口表現非常理想,其實根本係唔需要有咩要做。相反,就算出邊市況幾好,但你整體戶口表現奇差,你都一樣要盡快減倉,並作出檢討。投資者要時時刻刻考慮並先處理大倉嘅風險,每一隻個股只不過係一個工具,就好似足球比賽,贏波先係最終目的,明明場波一路佔上風咁梗係唔會無端端換球員,但換轉場波一路輸緊,打緊逆境波, 咁係咪要考慮變陣,換上新球員?
 
市弱嘅時候,散戶常犯嘅錯誤就係溝淡,因為諗住執平貨,可以溝低個平均買入價,到升返先賣出獲利。呢個做法喺市好嘅時候或者冇乜問題,仲有陣時俾散戶攞到甜頭。不過呢種學壞手勢嘅做法,一次股災就可以清袋!市弱嘅時候,專業操盤手通常只係會諗點樣減倉 cut exposure,係散戶先會溝貨加大exposure。你要知道,任何嘅股災都係由調整開始,所以倉位管理先係最要花時間去學習嘅地方(起碼對我來講係),但係亦都係最被忽略,最少投資書籍會講到嘅一個部份。
 
最後,等我公開米Sir一個小秘密俾大家知,米Sir 可以成為冠軍操盤手,係因為佢可以做到30年來,只有兩季虧損嘅紀錄!另外,30年以來佢平均嘅exposure 比率只係50% ,已經跑贏大市幾條街!所以唔係話所有錢放哂股票市場就一定贏大錢,漸進式加減倉(Progressive Exposure )先至係王道,即係專業賭徒嘅贏谷輸縮做法!
 
一連三篇嘅文章暫時去到呢度,好多謝莊博借呢一個平台比我分享自己嘅投資經歷。與其話幫人補習,其實係幫緊自己整理返我過往過嘅操盤經歷。如果反應熱烈,各位漁民仲想聽多啲我嘅經歷,我會嘗試再抽時間寫多啲,好多謝大家嘅支持!
 
其他漁民文章:
 

重要聲明:股市漁夫內的所有內容,包括本影片,絕不構成任何投資意見或購買任何股票及金融產品的特定推薦意見及/或不構成任何游說或要約,以購買、出售或以其他方式交易任何證券、期貨、期權或其他金融工具或其他產品,漁夫系統的內容亦並非就任何個別投資者的特定投資目標、財務狀況及個別需要而編製。投資者不應只按漁夫系統的內容進行投資。用戶必須留意,漁夫系統的所有訊號,並非是買賣訊號或任何投資建議,而所有訊號均是全自動用第三方提供之客觀市場數據計算出來的結果,當中並不涉及任何人為的想法、修改、修訂或任何投資建議。本網站包含的所有內容、資訊、訊號,並不針對任何特定的投資目標、財務狀況以及可能使用或接收該內容的特定人員的特定需求。在作出任何投資決定前,投資者應考慮各種金融產品的個別特點、個人的投資目標、可承受的風險程度及其他因素,並適當地尋求獨立的財務及專業意見。

詳情請重溫股市漁夫FAQ免責聲明。

最後更新: 2021-03-10